ИСКОНСКА ЉУБОВ

(Од необјавената поетска збирка „Кучешко време“, дел 10 „Ода за кучињата“)

 

Наутро, пред изгрејсонце,

Вљубено небото  фрла

Скриен поглед кон земјата

Се будат исконски чувства,

на чудна надземска љубов,

И во фатална прегратка,

На продуховени суштества

Со пламена и чиста страст,

Од утроба на светлина,

Се раѓа возбудна надеж

Само грозоморен лаеж

На подивени кучиња

Сурово внесува немир

во срцето на рожбата.